Coftal Ɓalli Men, tedduɓe heɗiiɓe e yeeɓooɓe on calminaama, bismillah mon ! Coftal Ɓalli Men e ndee aletaare hannde,                                                                                                                                                                                                                                                                                                                                                                                                                                                                                                   

 Fandaare ndee ko ndaarde walla ɓetde mbaawkaa daraniiɓe kisal Senegal. Ƴeewde darnde maɓɓe ko faati e faabagol yimbe. Heblo ngoo waɗa ko to Mboro e diiwaan Thies, e tawtoraagol denndaangal halfinaɓee kisal e faabagol yimɓe, kam e konuuji goɗɗi ɗii yoga e leyɗe Afrik. Jantoore Ibraahiima Niang

Caggal nde laamu faddewu hesu ngu darni guwernamaŋ mum aset hanki, nultondiraaɓe mawɓe fedde CEDEAO ina nganniyii yaade toon ngam yeewtitde e konunkooɓe ardiiɓe leydi ndii. E oo sahaa, jaayndeeji keewɗi ɗi ngonaa laamuyankooji koko kaɗaa udditde, haa teeŋti e rajooji ɗii.

Sanna Manjang gooto e tawanooɓe e catal konunkooɓe Gambie waɗannooɓe warngooji leeɓte e ko nanndi heen jaggaama hanki to Casamance worgo Senegal. Omo tuuma jeyeede e sikkaaɓe waɗde warngo Deyda Hydara, gonnooɗo imminaaɗo jaaynde AFP to Gambie e hitaande 2004. Ko ciimtol jaagorgal Gambie kalfinaangal humpito nantini oo kabaaru. Ngal ɓeydi heen wonde peeje nana ɓame ngam nawtugol makko to Gambie.

To Nigeria, e diiwal Borno, ko ɓe sappo e ɗiɗo, sukaaɓe rewɓe wonnooɓe e juuɗe kuliyankooɓe, konu nguu anndini faabaade ɓe aset hanki. Ko fedde jihaadiyankooɓe wi’eteende ISWAP siwlinooɓe ñande 23 jawtuɗo. Kamɓe fof ɓe ngartii eɓe kisi, e bi’ol konu ngu. Jantoore Bokar Tall

Fedde nde hooreejo kiɗɗo on Laurent Gbagbo ardi ɓami hanki fehre no sokaaɓe sabu haalugol jiyanɗe mum en (ILPO) ɗaccira. Fandaare ndii juɓɓudi hesiri ko ngam accitgol jokkuɓe mo ɓen nannganooɓe e seppo haɗanoongo ñande 11 lewru 10ɓuru. Mbele ɓe accitee ko ɓuri yaawude ko aldaa e jukkooje. Jantoore Abdoul Aziz Diallo.

Heɗiyannkooɓe rfi Fulfulde on salminaama. Bisminla mon ka taskaramji loluɗi e ndeeyonntere. Ndee yonntere ɗoo hiɗen suɓii laawol ganndal e needi e cellalko nŋallu. OumouBAH

Woni Koɗo men haande ko Daouda Ba, jaayndeyanke APS, hono jaaynde laamu Senegal. omo tawa e suɓtaaɓe e mbuñaari jantoore ɓurnde yuɓɓude e fannu ɗanle ɗee ɗooftaaki sariya. ko fedde jaayndeyankooɓe dillooɓe e ɗanle e kisal AJMS mbaɗno ndiin njuɓɓudi e hitaande 2022. E ndeen hitaande haa jooni, o heɓi kadi mbuñaari tataɓiri feddeadunayankoore toppitiinde ɗanle OIM.

Ɗum waɗi ko e ɗee balɗe jawtuɗe. Ɗee nanngule mbaɗi ko e lewru hade suɓngooji lefol laamu Guinee, baɗooji ñande 28 lewru 12ɓuru. Yoga e ɓeen nanngaama, kabaaruuji mum en keɓaaka haa jooni. Jaŋtoore Alhuseynu BAH

Konu leydi ndi yani, bonniti hanki ñiiɓirde lannda lunndo PAIGC. Muniru CONTE, gooto e mawɓe lannda ka woytiima ɗee baɗe. O tuumi ɓee konunkooɓe wonde sabaabu e ko waawi kewde fof e ndee nokkuure caggal nde ngummi ton. O naamndiima kadi yoo ɓee njaltu ton. Kettoɗen mo

Caggal nde hooreejo jaagorɗe o toɗɗaa, guwernama laamu faddewu ngu anndaama. Ko jaagorɗe 22 e hoolaaɓe kuuɓal 5 tawatee e nguu laamu. Dekere Hooreejo leydi ndi Horta Inta-a waɗi e wallitoraade miijoo hooreejo jaagorɓe keso o Ilidio Vieira Té, ne waɗi yimɓe 7 tawanooɓe e laamu Umaro Sissoco Embaló, kanndijo gooto e ɗii suɓngooji jawtuɗi e hooreeɓe lannda PAIGC. Jaŋtoore Ousmane EMBALO

Dental Jama'atu Izalatil Bid’ah Wa Iqamatus Sunnah, anndiraangal e JIBWIS - dental Juulɓe Salafinkooɓe nder leydi Naajeeriya anndinii mette maagal e haalaaji Donald Trump, hooreejo Ameerika balɗe caaliiɗe dow leydi Naajeeriya. JIBWIS wi'i "fitinaaji jogiiɓe balme (kaɓorɗe) yaalii kala diina nder leydi ndin". Winndiyanke (secrétaire) dental ngal, Baarista Mustafa Ɗaahiru Iisa wannginii no ardiiɗo Ameerika on faamaayi caɗeele ɗen, ko yimɓe woɓɓe ɓe ngalaa kaajal leydi njahrani-mo haalaaji ɗi ngalaa to peɗii. Ndaa wolde makko e faandu haala nuldiraaɗo men Abuja, Naseh Yusuf Usman.

Goodluck Jonathan, hooreejo Nigeria kiiɗɗo, suuti konngi aljuma hanki e alhaali Gibe-Bisaawo oo. Omo jeyanoo e ƴeewndotonooɓe suɓngooji baɗɗi e nder ndiin leydi ñande 23 lewru 11ɓuru ndu ngonɗen. O anndinii wonnde o yaltinira leydi ndii ko e laana ndiwoowa Koddiwaar. E ɗum o jaarniima Alasan Watara. E bi’ol makko o jáɓaani wonde ko samminere laamu waɗi to Gine-Bisaawo.Keɗoɗen mo

Guinee : Sariya keso ko yowiti e pelle politik wotaaɗo ka suudu sarɗiyanko CNT ñannde 21 ndu lewru ndu wonden saakitaam e nder dekere horeejo laamu hakkundewu ñannde hecci hankin 25 ndu lewru 11 ɓuru. E wie horeeɓe leydi ndin o saria ko fii moƴƴingol fiyaaku pelle politik hara ɗe gollaye no haaniri, no laaɓiri. Si tawi faandareeden ko haɗugol ɗuɗɗingol  yuɓɓingol pelle politik ; woɓɓe no wi’i o saria haɗaye ɓiɓɓe leydi ndin tawegol politik.

Heɗiyannkooɓe Rfi Fulfulde on salminaama. Ka Ka taskaram men Ko Mbiiɗon ? Ko yewteten kon hannde ko fii anndugol ko honɗun hakkile tafaaɗe e faransiire IA battinnta e nder golle yimooɓe ɓee. Fii ndee toɓɓere hiɗen jaɓɓi Jibril DIAW senegalnaajo hertorɗo walliatgol eɓooje yimooɓe. Fahin fii mun en yewtiday e Usmane TALL lirirɗo Marabi Wane yimoowo mo Burkina Faso. Ummu BAH

Heɗiyannkooɓe rfi fulfulde on salminaama. Bisiminla ka taskaram men kabaruuji yonntere. Koɗo mo jaɓɓiɗen on ko Mariam Selli KANE jayndeyannkeejo senegalnaajo golloowo kiɗɗo radiyoo taliwiijiyon leydi din woni RTS. Hannde ka kabaruuji men yonntere toɓɓe mawɗe ɗee yewteten e mum no tawaa alhaaliiji Gine Bissaawo e ɓawto nde laamu Umaru Sisseko Emballo jattaa. Woni ko nanngo lumdiiɓe laamu maa ko uddugol radiyooji no tawaa e toɓɓe ɗe yewte ɗen e mum. Fahin e nder mum en yewtay fii uddere leydi Najeriya e ɓawto ciwlagol yimɓe ɗuuɗuɓe waɗuɗi e ɗii saahaaji sakkitiiɗi ɗoo. Hombiren ndee yewtere men ndee jonnde kawtital leyɗeele Afrik e Erop waɗunde Luwannda. Oumou BAH

E sahaa nde ɓesnguuji e dartiyankooɓe ɗaɓɓiri ñaawoore e goonga wonande konuŋkooɓe 28 waraaɓe e hitaande 1990. Mooɓondire ɗee mbaɗii nder yoga e gure Moritani, heewɓe caraama, njaggaama ina heen daraniiɗo daraniiɗo hakkeeji rewɓe biyeteeɗo Dieynaba N’Diom. Hay so tawii ko ɓooyaani koo, laamu nguu eɓɓiino rokkude ndaamordi, waranaaɓe ɓee e hesniiɓe ɓee ciftinii wonde kaalis meeɗaa lomtaade ɗaɓɓaande ñaawoore laawɗunde timmunde Oumar El-Hadj Thiam.

Oo hooreejo kiɗɗo Gine-Bissau, caggal nde yalti leydi makko o ari Senegal hanki, hannde kadi o iwii Senegaal faade Konngo Brazzaville, leydi ɗo o mooli.

Ngam addude ñawndooje caɗeele leydi Senegal, hooreejo jaagorɓe guwernaman Senegal Ousmane Sonko, anndinii eɓɓooje ɗe laamu nguu ƴetti, yowitiiɗe e ko wiyatee plan de redressement economiŋue et social e peeje goɗɗe. Ɗum ko hanki e kuccondiral makko e depiteeɓe leydi ndii ngam yeewtude e toɓɓe jojjuɗi oo sahaa haa teewti e ngoƴaaji ɓiɓɓe leydi leydi ndii e kuuɓal. Ina jeyaa e ɗeen toɓɓe, caɗeele ŋakkere ngalu, caɗeele safaaro, nguura, jaŋde e ko nanndi heen. Ousmane Sonko e wonndiiɓe mum jaagorɓe kollitii peeje darnaaɗe ngam addude heen safaaro. Jaŋtoore Bokar Tall.

Guinee Bissau, leydi ndii heɓɓi hooreejo jagorɓe kiikiiɗe keñen. Ko Ilidio Vieira Té woni innde makko, kanko suɓɓa e ardaade guwernema laamu hakkundewu, ɗun caggal samineere laamu waɗude e alalbaare ndee. E son saha, fedde dental leyɗe UA nantini sinndugol Guinée Bissau e golleeji fedde ndee. Minati DIALLO

E alhaali ciiwlogol laamu waɗngu to Guinee Bissau, hooreejo jaaagorɓe laamu Senegal, Ousmane Sanko anndinii ko maalde waɗaande e dow keɓɗo poolgu e sungooji hooreyaaku leydi ndii jawtuɗi alet ɓennuɗo. O anndini ɗum ko kuccondiral makko e depiteeɓe leydi Senegal aljumaa hannde to suudu sarɗiyeeji leydi ndii. O hollitii kadi njaltudi ɗiin suɓngooji foti ko ɓaŋŋineede ngam poolɗo oo waawa ardaade leydi ndii e dow potal e sariya. E bi’ol Ousmane Sonko, ngol ciwlagol fawaaki e laawol. Keɗoɗen mo e faandu haala Bokar Tall.

Ko hannde e aljuma 28 lewru 11ɓuru orngal hooreyaaku fuɗɗii e hoore wertaango leydi ndii fow. E nder lewru timmundu, townuɓe hunndu ɓee 9yo etoto pooɗugol  wootiyankooɓe hella eɓɓooje maɓɓe. No jeyaa e maɓɓe Mamadi Dummbuya hooreejo laamu ƴanngal nguu jeyaaɗo e tiijjaaɓe foolay e ɗii suɓngooji. Lunndiiɓe laamu haqiiqaaɓe ɓen fow newnanaaka tawtoreede e ɗii suɓngooji saatiiɗi ñannde 28 lewru 12ɓuru ndee hitaande. Mammadu Adama Jallo

Hannde e aljuma, ñannde 28, 11ɓuru en yewtii ko yowiti e darnde rewɓe ngam haɓugol mbayligu weeyo e nder leyɗeele men, maa wi wi’a darnde rewɓe e nder reenugol taariindi men ndin hannde. Nde tawi mbayliigu weeyo ko e rewɓe ɓen ɓurata battinnde, hiɓe haani kamɓe rewɓe ɓen daraade darnde timmude e nder haɓugol oo alhaali. E nder adunaaru nduu fof rewɓe ɓen no jogii lowre jannde ko faatii e reenugol taariindi ndin. Kono darnde maɓɓe ndee timmii wo si tawi ɓe tawnoraama e nder haɓugol oo bone.

Deƴeere fuɗɗiima teskeede to Bisao lamorde Gine Bisao, uddere jemma nde ittaama, keeri ɗii kaddi udditaama kañum e lekkolaaji e majaaji ɗii. Leydi ndi heɓi horeejo laamu faddewu Jeneral Hortan Ntam. O waɗi wodoore makko hanki. Umaru Sossoko Mballo Emballo kam yottima Dakar. Amadou Barro BA

Salndu fedde leyɗe hirnaange Afrik tambiindu fewjodal e kisal hollitii aande mum mawnde e ko faati e caɗeel politik gonɗo e nder leydi Gine Bisaawo, haa teeŋti noon e sahaa mo ɓesngu Gine Bisaawo holliri tiiɗnaare mum en e darnde mum en e demokaraasi, tawi hiɓe tawtoree e wooteeji hooreyaaku leydi e nduu lewru ndu ngonɗen. Ko nii e konngol ɓurngol tiiɗde, ɓe yaggini ngol ciwlagol laamu baɗaaɗo ñalnde noogay jeego nduu lewru. Ndee fedde no namndii nde doosgal leydi ndii artirtee ko yaawi, tawa ko e dow sarɗiiji. Hanki ardiibe nden fedde wadi battu e dow internet Abdoulaye DIALLO