A Real Academia Galega e a Fundación Barrié abriron este martes 11 a campaña para a elección popular da Palabra do Ano 2025. Ambas as institucións presentaron no Concello de Lugo a nova edición dunha iniciativa cuxo resultado plásmase no pavimento da rúa Menorca, coñecida xa pola veciñanza luguesa como o Paseo das Palabras do Ano. O público poderá participar ata o 1 de decembro na fase de recolla de suxestións e, posteriormente, do 3 ao 21 de decembro, na votación que determinará que voz finalista será a gañadora. Todo o proceso realizarase virtualmente a través do Portal das Palabras, a web para a difusión do léxico da lingua galega que promoven a RAG e a Barrié.

Este vindeiro xoves 20 de novembro o Colexio Profesional de Xornalistas de Galicia celebra en horario de mañá, no auditorio da Facultade de Ciencias da Comunicación da USC, a xornada A comunicación corporativa: Comunicar con estratexia, realizada coa subvención da Deputación da Coruña e a colaboración da Facultade. Contará coa presenza de expertas en comunicación dixital e redes, e empresas tecnolóxicas como a axencia Nasas ou Altia, referente TIC galego.

O programa de viaxes pola nosa terra Sen Código Postal continúa o seu periplo polos concellos galegos da man do actor e humorista Víctor Fábrigas e da influente cubana Anita Mateu, veciña de Carballo. No segundo capítulo (este domingo ás 18.00 horas), logo da súa estadía en Narón, fan recalada en Brión, onde serán acompañados por Fátima Pego.

A Xunta de Galicia participa esta semana na Conferencia Europea de Tecnoloxías Cuánticas, que se celebra en Copenhague (Dinamarca). A Consellería de Educación, Ciencia, Universidades e FP dispón dun expositor para dar a coñecer a Rede galega de tecnoloxías cuánticas, integrada por máis dunha decena de entidades galegas que lideran o desenvolvemento destas solucións en campos como a computación, as comunicacións ou a sensórica.

O director da Axencia para a Modernización Tecnolóxica de Galicia (AMTEGA), Julián Cerviño, asiste en Barcelona ao Gartner IT Symposium/Xpo™ 2025, no que se abordan (a longo desta semana, dende o luns até o venres 14) as tendencias tecnolóxicas que están a marcar o futuro da administración pública e os servizos dixitais.

Dende o Centro de Documentación Sociolingüística de Galicia (CDSG) do Consello da Cultura Galega (CCG) co apoio da Universidade de Santiago de Compostela (USC),veñen de presentar unha nova entrega de Proxector, unha iniciativa de divulgación en lingua galega titulada Física cuántica: o enigmático mundo do pequeno, que conmemora dúas efemérides: o Ano Internacional da Ciencia e a Tecnoloxía Cuántica e o XVI Día da Ciencia en Galego.

A Deputación de Pontevedra comeza este martes 11 de novembro no Rosal as accións formativas do programa +Reto Dixital nas que participarán un total de 25 veciños e veciñas da localidade. Esta iniciativa da institución provincial, que ten previsto organizar este ano 70 obradoiros de capacitación tecnolóxica na provincia, ten o obxecto de formar as persoas maiores de 50 anos para facilitarlles o acceso aos servizos da Administración pública, dotalas de maior autonomía para xestionar os seus trámites cotiáns, e mellorar a súa calidade de vida grazas á adquisición de competencias dixitais.

Este mes de decembro a consultora tecnolóxica galega Vitae vai organizar a terceira edición dun curso que achega recursos directamente encamiñados a facilitar o traballo dos profesionais dos recursos humanos. A actividade, de doce horas de formación, pon o foco nas utilidades do que se coñece como IA Xenerativa, que é o concepto que engloba as ferramentas de IA para crear contido, como texto, imaxes, música, audio e vídeos.

A Cidade das TIC (antiga Fábrica de Armas da Coruña) vai servir de escenario este 21 de novembro a unha xornada de balde dirixida a mostrarnos as boas prácticas profesionais da Intelixencia Artificial no ámbito dos Recursos Humanos. Trátase da actividade formativa e divulgativa O novo marco legal para o bo uso da IA en HR, organizada por Vitae Consultores, o Colexio Profesional de Enxeñaría en Informática de Galicia (CPEIG), a Axencia Española de Supervisión da Intelixencia Artificial (AESIA), KELEA e o bufete galego especializado en novas ferramentas da información Pintos & Salgado. Desenvolverase en horario de mañá: de 10.50 a 14.00 horas.

Ata 1.800 fogares de 16 concellos da provincia de Lugo estrearon fibra óptica en seis meses. Trátase de familias que viven, sobre todo, en áreas rurais, peor comunicadas e con maiores necesidades de conectividade. Son datos achegados pola operadora Adamo, que executou a implantación desa tecnoloxía entre abril e setembro seguindo o mapa de despregadura fixado polo Ministerio para a Transformación Dixital e da Función Pública.

O título de acción cooperativa Arc Raiders, desenvolvido por Embark Studios, está a protagonizar un ascenso meteórico desde o seu lanzamento hai menos de dúas semanas. Segundo datos oficiais compartidos pola compañía, o xogo alcanzou os 700.000 xogadores simultáneos durante a pasada fin de semana, superando por segunda vez a súa propia marca.

A conselleira de Economía e Industria, María Jesús Lorenzana, visitou este luns 10 de novembro as instalacións da empresa tecnolóxica Trison, adicada á dixitalización de espazos: unha compañía “ultramoderna” con tecnoloxía “cen por cento galega”, dixo a conselleira, que a cualificou como “un exemplo do liderado innovador e do talento que alberga o tecido empresarial galego”. Dende Trison, con sede en Sada, convidou ás pemes galegas a incorporar a tecnoloxía aos seus procesos produtivos.

Pixel á Feira, o primeiro salón galego adicado en exclusiva ao videoxogo en Galicia, celebrado esta finde en Santiago, no Palacio de Congresos, resultou finalmente un éxito de público, de repercusión e, tamén, de creatividade e talento.

O III Foro da Industria Galega do Audiovisual (FIGA), organizado pola Academia Galega do Audiovisual co apoio do Concello da Coruña e da Deputación da Coruña, pechou a súa terceira edición consolidándose, en palabras das ditas entidades, “como un espazo de referencia para a reflexión sobre a diversidade e a inclusión no sector”.

A investigadora do CITIC da Universidade da Coruña, Amparo Alonso, foi unha das participantes destacadas no seminario sobre ética e intelixencia artificial organizado polo Arcebispado de Santiago en colaboración co empresariado galego, e que reuniu en Santiago a máis de duascentas persoas empresarias, directivas, expertas e profesionais do ámbito académico e científico. A catedrática da UDC analizou a Estratexia Española de IA nu relatorio na que se abordaron cuestións relacionadas coa gobernanza, o coñecemento, a educación e os valores.

O Campus Noroeste da UNED, que engloba aos centros de Galicia, Asturias, Castela e León así como Estremadura, ofrece, do 13 de novembro de 2025 ao 14 de xaneiro de 2026 o curso Intelixencia Artificial e Sociedade: Deseño, Ética e Aplicacións na Contorna Local. Este curso exponse como unha experiencia descentralizada, colaborativa e viva entre os centros do Campus Noroeste da UNED, co obxectivo de mostrar como se aplica e proxecta a IA en distintas contornas locais.

O pasado 8 de novembro a deputada de Muller e Igualdade e alcaldesa de Guitiriz, Marisol Morandeira, inaugurou a novena edición das Xornadas de Protección Civil da provincia centradas desta volta na ciberseguridade, un ámbito de acción que, segundo indicou, cobra cada día que pasa máis relevancia, porque as ameazas e os ataques non só comprometen a información en si mesma e as telecomunicacións, senón tamén (e sobre todo) á cidadanía.

O alumnado do segundo curso do Máster en Deseño, Desenvolvemento e Comercialización de Videoxogos, titulación que se imparte na Escola Politécnica de Enxeñaría de Ferrol (EPEF), presentou esta fin de semana no Pazo de Congresos e Exposicións de Santiago de Compostela, os títulos Neboa´s Hut, Splash on Contact e Purgatory Hoops. Fixérono no marco do Píxel á Feira, o primeiro Salón de Videoxogos de Galicia, impulsado pola Deputación da Coruña en colaboración co Concello de Santiago.

A Deputación de Pontevedra organiza esta semana catro novos obradoiros de capacitación tecnolóxica ao abeiro da Rede SmartPeme+. As accións, en formato telemático (todas requirindo inscrición previa), celebraranse do luns 10 ao xoves 13 de novembro e afondarán en cuestións de interese para o tecido empresarial da provincia como as redes sociais, a mercadotecnia dixital, o deseño 3D e, entre outros, a factura electrónica.

A directora do Observatorio de Dereitos Lingüísticos, Elsa Quintas, trasladou ao conselleiro de Educación, Román Rodríguez, as queixas recibidas pola Mesa pola Normalización Lingüística, a través da aplicación Liña do Galego e do propio Observatorio, respecto dunha exposición que o Goberno galego levou cando menos ao IES Xelmírez 2 de Compostela para concienciar sobre o uso do móbil, co logotipo da Xunta de Galicia e os contidos en castelán.

A Xunta de Galicia vén de pór en marcha o programa Menores conectados: educación dixital en ciberseguridade e privacidade, que prevé ata 250 obradoiros formativos dirixidos ás familias co obxectivo de ofrecerlles ferramentas e coñecementos que lles axuden a acompañar e orientar aos seus fillos no uso seguro, responsable e positivo das tecnoloxías no ámbito familiar e de lecer.

A Xunta porá en marcha a principios de 2026 os laboratorios e centros demostradores en ciberseguridade do futuro Centro de Excelencia en Ciberseguridade de Galicia (CECIGA). A actividade inicial destes espazos, que se desenvolverá na Cidade da Cultura mentres avanza a construción do centro definitivo, centrarase na prestación de servizos avanzados en ciberseguridade, no apoio ao cumprimento normativo, na realización de probas de produtos e servizos, no impulso á creación de solucións innovadoras e na formación especializada.

Google anunciou unha importante actualización da súa aplicación NotebookLM que amplía as posibilidades de uso educativo da ferramenta. A partir desta semana, os usuarios poden crear tarxetas de estudo (flashcards) e cuestionarios directamente desde os seus apuntamentos, o que permite memorizar termos clave, datas importantes e conceptos fundamentais de maneira máis dinámica e personalizada.

Blackmagic Design anunciou unha actualización importante da súa aplicación gratuíta Blackmagic Camera que facilita as retransmisións en directo tanto para creadores de contido como para profesionais da emisión audiovisual. A nova versión, dispoñible para Android e iOS, permite agora transmitir directamente a plataformas como YouTube, Twitch e Vimeo, sen necesidade de empregar aplicacións de terceiros nin dispositivos externos de codificación.

O conselleiro de Facenda e Administración Pública, Miguel Corgos, afirmou hoxe, na inauguración do XXXIII Congreso AUTELSI, que a Xunta continuará apostando por crear, atraer e reter talento co obxectivo de consolidar un sector tecnolóxico sólido.